| ការបរិយាយមិនទុកចិត្តរដ្ឋាភិបាលថៃ ក្នុងលើកនេះ ចាត់ទុកជាសង្គ្រាមស៊ីសាច់ហុចឈាមគ្នាក្នុងសភា ដែលមានចំណុចក្តៅទាំងគណបក្សប្រជាធិបតេយ្យរបស់រដ្ឋាភិបាល និងគណបក្សប្រឆាំង ដែលមានករណីសម្លុតបើកភ័ស្តតាង និង Videoclip នរណានៅពីក្រោយការបាត់បង់ជីវិតរបស់ពួកក្រុមអាវក្រហមចំនួន ៩១នាក់ និង របួស ២០០០នាក់... |
 |
| តាមសារព័ត៌មានថៃ បានឲ្យដឹងនៅថ្ងៃទី១៧ មិនា នេះថា ការប្រជុំសភាថៃ ដែលលើកឡើងករណីមិនទុកចិត្តរដ្ឋាភិបាលរបស់លោកអាប់ភីស៊ីត បានចូលដល់ថ្ងៃទី៣ហើយ ដោយក្រសែភ្នែកគ្រប់រូបនៅក្នុងសង្គមថៃ បដិសេធមិនបានថា ត្រូវតែតាមដានតាមសម្លឹងដោយមិនដាក់ភ្នែក ទាំងខាងរដ្ឋាភិបាល ដែលដឹកនាំដោយលោកអាប់ភីស៊ីត វេចាជីវ៉ា នាយករដ្ឋមន្រ្តីថៃ លោក សូថេប ធឿកបាន ឧបនាយករដ្ឋមន្ត្រីទទួលបន្ទុកសន្តិសុខជាតិ និង ខាងបក្សប្រឆាំងដឹកនាំដោយលោក ម៉ីងខ្វាន់ សែងសុវ៉ាន់ គណបក្សភឿថៃ រួមទាំងលោក ចាទូន ព្រំផាន់ និង លោកនិយាយមិនសន្សំចៃម៉ាត់គឺលោក ឆាឡឺម យូបាំរ៉ុង ដោយទាំងរដ្ឋាភិបាល និងខាងប្រឆាំង មានចំណុចព័ត៌មានក្តៅៗ លើកឡើងមកធ្វើសង្រ្គាមក្នុងសភា ដែលចុងក្រោយ បានធ្វើឲ្យលោក អាប់ភីស៊ីត ទាល់ច្រក បានប្រកាសរំលាយសភានៅក្នុងសប្តាហ៍ដំបូង ក្នុងខែឧសភា ខាងមុខនេះ ដើម្បីរៀបចំបោះឆ្នោតសារជាថ្មី នៅពេលបន្ទាប់។ |
 |
| ការបរិយាយមិនទុកចិត្តរដ្ឋាភិបាល របស់គណបក្សប្រឆាំង បានប្រើប្រាស់វេទិកាសភាធ្វើការវាយប្រហារផ្តួលរំលំរដ្ឋាភិបាលអាប់ភីស៊ីត មានជាច្រើនរឿង ដូចជា រឿងបញ្ហាសេដ្ឋកិច្ច តម្លៃទំនិញឡើងខ្ពស់កប់ពពក ទាំងប្រេងឆា ស្ករស និង គ្រឿងបរិភោគផ្សេងៗទៀត រួមទាំងបញ្ហាជីវភាពក្រីក្ររបស់ប្រជាជន ដែលខាងបក្សប្រឆាំងរដ្ឋាភិបាលចោទទៅការដឹកនាំដែលមិនត្រឹមត្រូវរបស់រដ្ឋាភិបាល កើតចេញអំពើទុច្ចរិត និង អំពើពុករលួយ រួមទាំងការគេចពន្ធបារីតម្លៃ ៦,៨ ម៉ឺនលានបាត និង បញ្ហាប្រើអំពើហឹង្សាក្នុងការបំបែកហ្វូងបាតុករនៅបរិវេណផ្លូវបំបែក រ៉ាច ឆាប្រាសុង រហូតធ្វើឲ្យមានអ្នកបាត់ជីវិត ៩១នាក់ និង របួសជាង ២០០០នាក់ ដែលខាងរដ្ឋាភិបាលអាប់ភីស៊ីត ក៏បានអះអាងឆ្លើយតបទៅគណបក្សប្រឆាំងរួចហើយ។ ប៉ុន្តែករណីការបាត់ជីវិតក្រុមហ្វូងបាតុករ នៅ រ៉ាច ឆាប្រាសុង កាលពីថ្ងៃទី១៩ ឧសភា ឆ្នាំកន្លងមក និង ការដុតបំផ្លាញហាងទំនិញ Central World ធ្វើឲ្យខូចខាតយ៉ាងធ្ងន់ធ្ងរ ខាងប្រឆាំងបានពោលចោទទៅលោក អាប់ភីស៊ីត ជាអ្នកបញ្ជាទាហានឲ្យប្រើអំពើហឹង្សាទៅលើក្រុមជួបជុំ ព្រមទាំងសម្លុត នឹងបើក Videoclip ពីលោក ចាទូន ព្រំផាន់ និង មេដឹកនាំក្រុមអាវក្រហមដទៃទៀត រហូតបានធ្វើឲ្យលោកនាយករដ្ឋមន្រ្តីឡើងកម្តៅ ១០០អង្សា ទ្រាំមិនបាន ក៏ឡើងឆ្លើយត្រឡប់វិញថា ត្រូវរង់ចាំមើល ព័ត៌មានក្នុងការបរិយាយមិនទុកចិត្តក្នុងសភាលើកនេះសិន ហើយនឹងដឹងថា នរណាពិតប្រាកដដែលត្រូវការឲ្យមានអ្នកស្លាប់ ហើយនរណាជាអ្នកដុតហាងទំនិញ Central World។ ដោយសភាឲ្យមានការបើក Videoclip នៃហេតុការណ៍ទាំងសងខាង ដើម្បីពិសោធន៍រកការពិត ដែលធ្វើឲ្យមានសង្គ្រាមក្នុងសភាមានការប្រយុទ្ធគ្នា យ៉ាងក្តៅគគុក។ |
| ដោយឡែកមួយទៀត ក្រុមខាងក្រុមបក្សប្រឆាំង បានធ្វើការវាយប្រហារទៅលើលោក កាស៊ីតភីរម្យ រដ្ឋមន្រ្តីក្រសួងការបរទេសថៃ ដោយចោទថា លោក កាស៊ីត ជាមនុស្សអសមត្ថភាពក្នុងការដឹកនាំក្រសួង ពិសេសក្នុងការទំនាក់ទំនងការទូតជាមួយប្រទេសជិតខាង គឺដោះស្រាយអ្វីមិនចេញទាំងអស់ មានតែដោះស្រាយបង្កឲ្យមានជម្លោះជាមួយប្រទេសជាមិត្ត ធ្វើឲ្យខាតបង់ខាងសេដ្ឋកិច្ចយ៉ាងធ្ងន់ធ្ងរ ដោយសារការដោះស្រាយតាមការទូតមិនបានល្អ រួមទាំងបង្កសង្គ្រាមជាមួយកម្ពុជាថែមទៀតផង។ |
| ព័ត៌មានចុងក្រោយនៅព្រឹកថ្ងៃទី១៧ នេះ ដែលថ្ងៃទី៣ ការបរិយាយមិនទុកចិត្តរដ្ឋាភិបាល គេសង្កេតឃើញមានកងកម្លាំងតំរួត និង រថយន្តការពារយ៉ាងច្រើនដាក់ត្រៀមនៅជុំវិញអគាររដ្ឋសភា ដើម្បីការពារខ្លាចក្រែងមានក្រុមពួកជួបជុំ បុកចូលមុខរដ្ឋសភា ដែលកំពុងធ្វើការប្រជុំ៕ |
 |
 |
 |
 |
6:38 AM
seangkhun
Posted in: KHMER NEWS
0 comments:
Post a Comment