4:21 AM
seangkhun
Friday, 18 March 2011 14:09
វង្ស សុខេង
ជំនួប រវាងមន្ត្រីជាន់ខ្ពស់កម្ពុជា និងមន្ត្រីអាមេរិក នៅក្រសួងការបរទេសកម្ពុជា កាលពីថ្ងៃម្សិលមិញ។ រូបថត សុវណ្ណ ភីឡុង
ភ្នំពេញៈ ក្រុមអ្នកជំនាញបញ្ជូនមកប្រទេសកម្ពុជា ដោយលោកស្រី ហ៊ីឡារី គ្លីនតុន ដែលដឹកនាំដោយលោក ចូសេហ្វ យុន ឧបការីរង រដ្ឋមន្ត្រីក្រសួងការបរទេសអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក បានចូលជួបជាមួយលោករដ្ឋមន្ត្រីក្រសួងការបរទេស ហោ ណាំហុង កាលពីថ្ងៃព្រហស្បតិ៍ម្សិលមិញ ដើម្បីពិភាក្សា អំពីការវិវត្តនៃសំណើសុំលុបចោលបំណុលដែលកម្ពុជា ជំពាក់អាមេរិក ក្នុងសម័យលោកសេនាប្រមុខ លន់ នល់។
លោក កុយ គួង មន្ត្រីអ្នកនាំពាក្យក្រសួងការបរទេសកម្ពុជា បានថ្លែងប្រាប់អ្នកកាសែត ក្រោយជំនួបនោះថា លោកឧបនាយករដ្ឋមន្ត្រី ហោ ណាំហុង បានស្នើដល់ភាគីអាមេរិក ឲ្យបន្ថយអត្រាការប្រាក់ពីបីភាគរយ មកនៅត្រឹមមួយភាគរយវិញ ក្នុងមួយឆ្នាំ ហើយបំណុល ៧០ ភាគរយ គួរបង្វែរទៅជាជំនួយសម្រាប់គម្រោងអភិវឌ្ឍន៍ ខណៈបំណុលនៅសល់ ៣០ ភាគរយ នឹងត្រូវធ្វើការសងរំលស់។ មន្ត្រីអ្នកនាំពាក្យរូបនេះ បានបន្តថា លោកចូសេហ្វ គ្រោងនឹងចូលជួបជាមួយរដ្ឋមន្ត្រីក្រសួងសេដ្ឋកិច្ច ដើម្បីបញ្ជាក់លម្អិត អំពីបញ្ហាបំណុលនោះ។ លោកបានមានប្រសាសន៍ថា៖«ឆន្ទៈនយោបាយរបស់យើង គឺតម្រូវឲ្យមានការលុបបំណុលចោល ហើយឥឡូវនេះ យើងត្រូវតែត្រួសត្រាយផ្លូវ ទៅកាន់ចំណុច ដែលអាចធ្វើការចរចា និងសម្រេចកិច្ចព្រមព្រៀងជាមួយគ្នាបាន ហើយនៅពេលយើងលើកឡើង អំពីចំណុចដែលសហរដ្ឋអាមេរិក មិនឯកភាព យើងមិនអាចដោះស្រាយបញ្ហាបានទេ ដូច្នេះយើងត្រូវតែបង្កើតផ្លូវទៅកាន់ចំណុចមួយ ដែលនឹងមានការឯកភាព ពីគ្រប់ភាគី ហើយដំណើរការកំពុងវិវត្តឆ្ពោះកាន់តែកៀក [ទៅរកការព្រមព្រៀងគ្នា]»។
នៅក្នុងប្រសាសន៍ធ្វើឡើង កាលពីខែកញ្ញាឆ្នាំទៅ លោកនាយករដ្ឋមន្ត្រី ហ៊ុន សែន បានអំពាវនាវដល់អាមេរិក ឲ្យអនុគ្រោះដល់អ្វីដែលលោកបានហៅថា ជា «បំណុលកខ្វក់» ដែលខ្ចីដោយរដ្ឋាភិបាលយោធារបស់លោកសេនាប្រមុខ លន់ នល់ ដែលបានឡើងកាន់អំណាច ក្រោយរដ្ឋប្រហារឆ្នាំ ១៩៧០ និងមូលនិធិ សម្រាប់ប្រតិបត្តិការ ទម្លាក់គ្រាប់បែក ដែលគាំទ្រដោយអាមេរិក។
រដ្ឋាភិបាលលោក លន់ នល់ ត្រូវបានផ្តួលរំលំ កាលពីថ្ងៃ ១៧ មេសា ឆ្នាំ ១៩៧៥ ដោយរបបខ្មែរក្រហម ដែលក្នុងអំឡុងពេលមិនដល់បួនឆ្នាំ នៃការឡើងកាន់អំណាចរបស់របបអាវខ្មៅនេះ ប្រជាជនប្រមាណ ១,៧ លាននាក់ ត្រូវបានសម្លាប់។
បំណុលកម្ពុជាជំពាក់អាមេរិកបច្ចុប្បន្ន មាន ៤៤៥ លានដុល្លារ រួមនឹងការប្រាក់ ប៉ុន្តែលោក កុយ គួង បានថ្លែងថា បំណុលដែលត្រូវបានពិភាក្សាគ្នា កាលពីឆ្នាំ ២០០៥ មានត្រឹមតែ ១៦២ លានដុល្លារ ហើយរួមជាមួយការប្រាក់ កើនឡើងដល់ជាង ៣០០ លានដុល្លារតែប៉ុណ្ណោះ។
លោកចូសេហ្វ ពុំបានផ្តល់បទសម្ភាសជាមួយអ្នកកាសែតទេ ក្រោយជំនួបជាមួយលោក ហោ ណាំហុង ប៉ុន្តែមន្ត្រីអ្នកនាំពាក្យបានថ្លែងថា ក្រុមអ្នកជំនាញ ដែលត្រូវបានបញ្ជូនមកនេះ បានសន្យាពាំនាំនូវសំណើរបស់ភាគីកម្ពុជា ជូនដល់រដ្ឋការអាមេរិក។
លោក កុយ គួង បានថ្លែងថា៖ «លោកចូសេហ្វ បានយល់ព្រមថា ការបន្តចរចាគ្នា រវាងកម្ពុជា និងអាមេរិក នឹងខិតទៅរកការព្រមព្រៀងគ្នាមួយ»៕ CR
Posted in: KHMER NEWS
0 comments:
Post a Comment