2:24 AM
seangkhun
ពីព្រឹកព្រលឹមនៅថ្ងៃចន្ទ ទី២១ មីនា នេះ ប្រជាពលរដ្ឋសហគមន៏បឹងកក់ប្រមាណ១៥០នាក់ បានប្រមូលផ្តុំគ្នានៅមុខច្រកចូលសាលាក្រុងភ្នំពេញ ជាមួយការស្រែកទាមទារយ៉ាងសន្ធាប់ថា យើងឈប់ចង់បានការចរចាហើយ ពួកយើងចង់បានការដោះស្រាយមួយដែលមានភាពច្បាស់លាស់។ ការចរចាដែលត្រូវបានប្រជាពលរដ្ឋក្នុងសហគមន៏និយាយថា វាបានក្លាយទៅជាការបោកប្រាស់ម្តងហើយ ម្តងទៀត ដោយសាលាក្រុងភ្នំពេញ។
អ្នកបឹងកក់ក្នុងពេលតវ៉ានៅខាងមុខសាលាក្រុងភ្នំពេញកាល ពីព្រឹកមិញ
ក្រុមអ្នកភូមិដែលមានក្មេង ចាស់ ប្រុសស្រី និងមានឧបករណ៏បំពងសម្លេងនៅក្នុងដៃផងនោះ បានក្តាប់ដៃ ហើយស្រែកទាមទារព្រមៗគ្នាថា «ចេញមក ឯកឧត្តម កែប ជុតិមា ដើម្បីនិយាយគ្នារឿងដី១៥ហិកតា អភិវឌ្ឍន៏លំនៅដ្ឋាននៅនឹងកន្លែង។ យើងឈប់ជឿលើការចរចារបស់អ្នកឯងហើយ។ ហេតុអី បានជាអ្នកឯងមិនចេញ, ពួកឯងកំសាក ហ៊ានចេញមុខតែនៅពេលការឃោសនារកសម្លេងឆ្នោត ប៉ុន្តែនៅពេលនេះ យើងជួបបញ្ហា ពួកអ្នកឯងបានបិទមុខដូចពង្រូល។
រហូតដល់ម៉ោងប្រមាណ១០ ប្រជាពលរដ្ឋនៅតែបានធ្វើការទាមទារយ៉ាងស្វិតស្វាញ បើទោះបីជារថយន្តល្បើករបស់សាលាខណ្ឌដូនពេញចំនួន២គ្រឿងត្រូវបាន ត្រៀមចាំ ជាមួយក្រុមអន្តរាគមន៏ដែលប្រដាប់ដោយគ្រាប់បែកផ្សែង និងដំបងឆក់ប្រមាណជាង៥០នាក់នៅឈរត្រៀបត្រា ជាមួយការចុចដំបងឆក់បញ្ចេញភ្លើងពណ៌ខៀវ លឺសូរប្រែសៗ ជាការគំរាមដល់ប្រជាពលរដ្ឋដែលមានការឈឺចាប់ទាំងនោះក្តី ក៏ពួកគាត់ពុំបានថមថយឡើយ គឺគ្រាន់តែផ្លាស់ប្តូរស្ថានភាពនៃការតវ៉ាពីឈរមកអង្គុយតែ ប៉ុណ្ណោះ។
យ៉ាងណាក៏ដោយ ក្រុមមន្រ្តីសាលាខណ្ឌបានសាកល្បងមកនិយាយជាមួយពួកគាត់ឲ្យផ្លាស់ ប្តូរទីតាំងការចរចា ពីខាងមុខសាលាក្រុង ទៅកាន់ទីលានប្រជាធិបតេយ្យ នៅខាងមុខស្ថានីយ៏រថភ្លើងវិញ, ប៉ុន្តែក្រុមប្រជាពលរដ្ឋបានបដិសេធដាច់អហង្កាចំពោះទីលានមួយដែល ត្រូវបានលើកឡើងថា មានភាពស្ងាត់ជ្រងំដូចទីស្មរសាននោះ។
ដោយពុំមានការថមថយពីប្រជាពលរដ្ឋ និងមានការសង្រ្គឺតខ្លាំងពីកម្លាំងបង្រ្កាបបាតុកម្ម ដែលត្រូវបានគេយកមកសម្រាប់បង្រ្កាបលើប្រជាពលរដ្ឋដែលតវ៉ាដោយ សន្តិវិធីនោះ ទីបំផុតទៅនៅម៉ោងប្រមាណ១១ និង២០នាទី សាលាក្រុងភ្នំពេញបានអនុញ្ញាតិឲ្យអ្នកតំណាងប្រជាពលរដ្ឋចំនួន ៥នាក់ចូលជួប ដើម្បីពិភាក្សាចំពោះសំណើទាមទាររបស់ពួកគេ ដែលសុំផ្ទៃដីទំហំ១៥ហិកតានៅតំបន់បឹងកក់សម្រាប់ការសាងសង់លំនៅនៅ នឹងកន្លែង ដែលបានដាក់ឲ្យសាលាក្រុងភ្នំពេញកាលពីសប្តាហ៏មុននោះ។ បើទោះជាដូច្នេះក្តី ប្រជាពលរដ្ឋបាននិយាយថា ពួកគាត់នឹងធ្វើការតវ៉ារបៀបនេះដោយមិនទទួលយកការចរចាទេ បើសិនជាដំណោះស្រាយមួយពុំត្រូវបានធ្វើសម្រាប់សំណើរបស់ពួកគាត់ នោះ។ រហូតមកដល់ម៉ោង១១ និង៤០នាទី លទ្ធផលនៃការជួបពិភាក្សានោះពុំទាន់ត្រូវបានគេបង្ហាញឲ្យដឹងនៅ ឡើយទេ៕
Posted in: KHMER NEWS
0 comments:
Post a Comment