| ក្រសួងការពារជាតិជប៉ុន បានឲ្យដឹងថា កម្លាំងការពារប្រទេសនេះ មិនអាចអនុវត្តផែនការជះទឹកទៅក្នុងឡប្រតិកម្មលេខ៣ របស់រោងចក្រ Fkushima ទី១ ពីឧទ្ធម្ភាចក្របានឡើយ ដោយកម្រិតវិទ្យុសកម្មជុំវិញរោងចក្រខ្ពស់ពេក។ ស្ថាប័នសុវត្ថិភាពឧស្សាហកម្ម និង នុយក្លេអ៊ែរជប៉ុន (NISA) បានឲ្យដឹងកាលពីថ្ងៃទី១៥ មិនា បរិមាណទឹកធ្វើឲ្យត្រជាក់នៃឡប្រតិកម្មលេខ៥ របស់រោងចក្រ Fkushima ទី១ បានថយចុះ ហើយពេលនេះ បុគ្គលិកកំពុងបូមទឹកបញ្ចូល ដើម្បីធ្វើឲ្យត្រជាក់។ ក្នុងពេលនេះដែរ ប្រព័ន្ធម៉ាស៊ីនព្យាករណ៍កម្រិតសាយភាយសារធាតុវិទ្យសកម្មមានឈ្មោះថា SPEEDI មានការរអាក់រអួល មិនអាចធ្វើសកម្មភាពបាន។ |
 |
| NISA បានឲ្យដឹងថា មិនអាចដឹងពេលណាទើប SPEEDI ដំណើរការឡើងវិញបានទេ។ អាស្រ័យដោយបរិមាណវិទ្យុសកម្មនៅតំបន់រោងចក្រមាននិន្នាការថយចុះ ហេតុនេះកម្មករ ដែលបានជម្លៀសចេញបណ្តោះអាសន្នមុននេះ បានវិលមករោងចក្រធ្វើការវិញនៅថ្ងៃទី១៦ មិនា។ ក្នុងពេលនោះដែរ សីតុណ្ហភាពនៅឡប្រតិកម្មលេខ២ មានស្ថេរភាពឡើងវិញ ហើយសម្ពាធក៏បានថយលចុះ។ |
| ក្នុងថ្ងៃនេះដែរ ស្ថានរាជទូតជប៉ុននៅ Vienna (អូទ្រីស្ត) លោក Takeshi Nakane បនស្នើសុំស្ថាប័នថាមពលបរមាណូអន្តរជាតិ (IAEA) ឆាប់រហ័ស ក្នុងការបញ្ជូនអ្នកជំនាញនុយក្លេអ៊ែរ មកជប៉ុន ដើម្បីជួយស្ថារសភាពការណ៍នៅរោងចករ្អគ្គិសនីនុយក្លេអ៊ែរ Fukushima ទី១។ |
| ក្នុងបទសម្ភាសជាមួយសារព័ត៌មាន Kyodo ឯកអគ្គរាជទូត Nakane បានឲ្យដឹងថា ក្រុងតូក្យូ សង្ឃឹមថា បណ្តាអ្គការអន្តរជាតិ នឹងជួយធ្វើការផ្សព្វផ្សាយ វាយតម្លៃមានភាពត្រឹមត្រូវ អំពីគ្រោះមហន្តរាយនុយក្លេអ៊ែរនៅជប៉ុន ហើយក៏បង្ហាញបំណងចង់ឲ្យក្រុមអ្នកជំនាញរបស់ IAEA មកកាន់កន្លែងកើតហេតុនុយក្លេអ៊ែរ ឲ្យបានកាន់តែឆាប់ កាន់តែល្អ។ |
 |
| មុននេះដែរ អគ្គនាយក IAEA លោក Yukiya Amano ក៏បានលើកឡើងថា នឹងបញ្ជូនក្រុមអ្នកជំនាញការឲ្យបានឆាប់ទៅកាន់ប្រទេសជប៉ុន ដើម្បីវាយតម្លៃឲ្យបានត្រឹមត្រូវ ពីគ្រោះមហន្តរាយនុយក្លេអ៊ែរនៅជប៉ុន ហើយបច្ចុប្បន្ន វិស័យពីរ ដែល IAEA យកចិត្តទុកដាក់ គឺការឆេះឡប្រតិកម្ម និង គ្រោះជ្រៀបចេញវិទ្យុសកម្ម នៅរោងចក្រ Fukushima ទី១។ លោក Amano នៅបានពោលបន្ថែមថា សភាពការណ៍ពេលនេះ មានភាពស្មុកស្មាញ ហើយពិបាកក្នុងការព្យាករណ៍ តែទោះយ៉ាងណា ក៏វាមិនដូចមហន្តរាយនៅ Chernobyl ឆ្នាំ ១៩៨៦ ដែរ។ |
| នៅថ្ងៃដដែលនេះដែរ ក្រសួងការពារជាតិជប៉ុន បានឲ្យដឹងថា ទាហាន ៦.៤០០នាក់ ត្រូវបានបញ្ជូនទៅក្នុងតំបន់ឦសាន្តនៃប្រទេសជប៉ុន ដើម្បីជួយស្តារផលវិបាកបន្សល់ទុកដោយការរញ្ជួយដី និង រលកយក្ស។ កងយោធាបំរុងនេះ នឹងចូលជួបជាមួយពលទាហាន ៨០.០០០នាក់ ដែលបាននឹងកំពុងអនុវត្តកិច្ចការសង្គ្រោះខាងលើ។ |
 |
| ក្នុងពេលនោះដែរ រដ្ឋមន្រ្តីក្រសួងកសិកម្ម Michihiko Kano ប្រកាសថា រដ្ឋាភិបាលជប៉ុន ត្រៀមជាស្រេចក្នុងការបញ្ចេញអង្ករ ក្នុងស្តុក ដើម្បីផ្គត់ផ្គង់ដល់តំបន់ ខ្វះស្បៀងអាហារ។ លោក Kano បញ្ជាក់ថា មូលហេតុខ្វះស្បៀងសង្គ្រោះ គឺអាស្រ័យដោយការដឹកជញ្ចូនមានឧបសគ្គច្រើន ដោយផ្លូវគមនាគមន៍ ត្រូវកាត់ផ្តាច់ ដោយការរញ្ជួយដី។ លោក ក៏អំពាវនាវឲ្យពលរដ្ឋមានស្មារតីនឹងន មិនចាំបាច់ស្តុកទំនិញ លើសពីកម្រិតចាំបាច់ទេ។ |
| ធានគារជប៉ុន (BOJ) កាលពីថ្ងៃទី១៦ មិនា ម្សិលមិញ បានសន្យាបញ្ចេញបន្ថែម ១៣,៨ពាន់ពាន់លានយ៉េន (ប្រមាណ ១៧០ពាន់លានដុល្លារសហរដ្ឋអាមេរិក) នៅក្នុងទីផ្សារហិរញ្ញវត្ថុ តម្លើងថវិការសរុបក្នុងមូលនិធិជំនួយបន្ទាន់ ដល់ទៅ ៥៥,៦ពាន់លានយ៉េន (៦៨៨,៤ពាន់លានដុល្លារសហរដ្ឋអាមេរិក) សំដៅការពារប្រព័ន្ធធនាគារចំពោះមុខ ឥទ្ធិពលធ្ងន់ធ្ងរក្រោយការរញ្ជូយដី។ |
 |
| បរិមាណទឹកប្រាក់បំពេញបន្ថែមខាងលើនោះដែរ មាន ៥០០០ពាន់លានយ៉េន ត្រូវបានបញ្ចេញភ្លាម ដើម្បីជួយសម្រាប់បណ្តាអង្គការហិរញ្ញវត្ថុ ក្នុងគោលបំណងធានាបណ្តាខ្ទង់ឲ្យខ្ចីរយៈពេលខ្លី ហើយ ៨.៨០០ពាន់លានយ៉េនទៀត នឹងត្រូវបញ្ចេញនៅថ្ងៃទី១៧ មិនា និង ទី១៨ មិនា៕ |
6:39 AM
seangkhun
Posted in: KHMER NEWS
0 comments:
Post a Comment