7:28 PM
seangkhun
ដោយ ៖ អប្សរា
ថ្ងៃ អង្គារ ទី ២២ ខែ មិនា ឆ្នាំ ២០១១
(រូបថត ច័ន្ទថា)
សម្ដេចតេជោថ្លែងក្នុងវេទិកា
ខេត្តបាត់ដំបង ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវដល់ប្រជាពលរដ្ឋកម្ពុជាទាំងអស់សូមឈប់ ឬផ្អាកការធ្វើចំណាកស្រុកទៅធ្វើការនៅប្រទេសដទៃ និងត្រូវរកចាប់ខ្លួនមេខ្យល់ដែលដឹកនាំពលករទៅធ្វើការនៅស្រុក គេខុសច្បាប់ផងដែរ ។
សម្តេចតេជោនាយករដ្ឋមន្ត្រីអំពាវនាវបែបនេះ នាព្រឹកថ្ងៃទី២១ មីនា ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីបើកការដ្ឋាន ស្ថាបនាផ្លូវជាតិលេខ៥៧B មានប្រវែង១៧៦,៣៥គីឡូម៉ែត្រ ក្រោមឥណទានកម្ចីសម្បទានរបស់សាធារណរដ្ឋប្រជាមានិត និងថវិកាបដិភាគរបស់រាជរដ្ឋាភិបាល ។ ពិធីនេះបានប្រារព្ធធ្វើនៅក្នុងបរិវេណអនុវិទ្យាល័យភូមិថ្មី ក្នុងឃុំបន្សាយត្រែង ស្រុកថ្មគោល ខេត្តបាត់ដំបង ដោយមានការអញ្ជើញចូលរួមពីលោកផាន គ័ងស៊ា ឯកអគ្គរដ្ឋទូតចិនប្រចាំកម្ពុជាផងដែរ ។
ទាក់ទិននឹងបញ្ហាខាងលើ សម្តេចតេជោនាយករដ្ឋមន្ត្រីបញ្ជាក់ថា បច្ចុប្បន្ននៅប្រទេសកម្ពុជាយើងកំពុងខ្វះកម្លាំងពលកម្ម ។ ចំពោះអ្នកដែលនាំទៅធ្វើការដូចជានៅប្រទេសថៃ គឺគេឱ្យបេះពោត ដកដំឡូង កាប់អំពៅ ដូច្នេះការងារទាំងអស់នេះក៏ដូចជាការងារនៅក្នុងស្រុកខ្មែរដែរ ហើយចំណាយតិច និងគេមិនមើលងាយដល់បងប្អូនប្រជាពលរដ្ឋទៀត គេមិនចាប់ មិនចងទៀតផង ។
សម្តេចតេជោនាយករដ្ឋមន្ត្រីមានប្រសាសន៍បន្ត ថា ការចូលទៅធ្វើការនៅប្រទេសថៃ មានកត្តាច្រើនណាស់ចំពោះបងប្អូនទៅធ្វើការខុសច្បាប់ រដ្ឋាភិបាលរបស់គេក៏មានការពិបាកដែរ ម្យ៉ាងប្រជាពលរដ្ឋរបស់គេ ម្យ៉ាងប្រជាពលរដ្ឋទៅពីឡាវ ភូមា កម្ពុជា ទៅចូលធ្វើការនៅទីនោះ ។
ចំពោះការងារដែលធ្វើនៅកម្ពុជា តម្លៃមិនខុសគ្នាប៉ុន្មានទេ ហើយការទៅធ្វើការនៅប្រទេសគេក៏មិនឱ្យយើងធ្វើថៅកែគេទេ គេឱ្យធ្វើកម្មករសំណង់ កសិដ្ឋានដូចតែនៅកម្ពុជាដែរ ។ ដូច្នេះហើយបានជាស្រូវមួយចំនួនយកទៅលក់គេអត់ហ៊ានទិញ ពីព្រោះផ្លែស្រូវនោះវាញោស(ទុំជ្រុល)ក៏ដោយសារខ្វះកម្លាំង ពលកម្មច្រូតកាត់ ។ ប៉ុន្តែយ៉ាងណាក៏ដោយ ឆ្នាំនេះបរិមាណនៃការនាំអង្ករចេញកម្ពុជាបាននាំចេញអង្ករ២,៥ លានតោននិង៤លានតោនស្រូវ ៕
Posted in: KHMER NEWS
0 comments:
Post a Comment